for SATB chorus with occasion divisi
彳亍叮叮 (2014/2021)
Commissioned by Diocesan’s Girls School in 2014
Lyrics by Clement Lee, Music by Austin Yip
微風吹拂 (2021)
Commissioned by Hong Kong Youth Choir in 2021
Music and Lyrics by Austin Yip
從西到東 (2021)
Commissioned by Hong Kong Youth Choir in 2021
Music and Lyrics by Austin Yip
- Perform by Hong Kong Youth Choir at JC Cube, Tai Kwun, Hong Kong on 4 December, 2021 (SAT), 4:30pm/ 8:00pm
Programme Notes
《城市說》係一個橫跨左八年既作品。入面既第一首，《彳亍叮叮》，係2014年由拔萃女書院委約，為佢地既女聲合唱團而寫。當時，指揮既Grace首先搵左李君衎先生去作詩，然後我就根據住佢既詩去寫左呢首作品。係我第一次睇到李君衎先生既詩既時候，我已經被佢所描繪既港島區吸引住。入面最常出現既，就係兩組擬聲詞，「彳亍」同「叮叮」，分別代表住行緊既人，同電車既聲音。係呢兩組聲音不斷穿插下，李君衎先生將港島區既特色以好詩意既方法寫左出黎。當我譜成音樂時，亦都希望將佢既色彩變化表達返出黎，用音樂帶大家遊走港島最核心既地段。
過左好多年之後，係2021年香港新青年合唱團既指揮鄭智山先生邀請我，將《彳亍叮叮》變成「香港交通三部曲」。除左叮叮之外，佢希望我可以再寫多兩首富有香港特色既交通工具。係云云眾多既交通工具入面，我選擇左兩種我自己經常會乘搭既，就係天星小輪同埋紅VAN，去延續《彳亍叮叮》既旅程。係《彳亍叮叮》後，《微風吹拂》帶大家去到中環碼頭附近，感受下海風，亦都聞下海水味。係我地熟悉既大會堂隔離，第四代郵政總局將會被拆除，以前曾經係海既地方，而家都變晒做陸地。我希望呢首歌可以好似攝影咁，將今日既中環記錄低，亦都將我地平時由大會堂搭船去尖沙咀既旅程寫落黎。
第三首係《從西到東》，講述由美孚到觀塘既紅VAN既所見所聞。我成日都覺得呢段路，可以睇到香港好獨特既一面。特別係夜晚，當大家都收左工，可以搭到架有空位既紅VAN，由西到東，望住窗外既景色，係一件好浪漫既事。由美孚到深水埗果段，乘客會體驗到紅VAN既慢、深水埗既活力、同埋司機對路邊招手既人既警覺性。但一去到界限街，當紅VAN唔會再上客之後，果份不安既速度感，就一發不可收拾。直至有人叫落車（仲要一定叫啱名），架VAN先會以最快速度停低，再以最快速度開車。作詞既時候，醒起以前搭呢條線有啲站，而家都無乜人用，例如「光明頂」咁。情況就好似九龍城既「食為先」咁，一切改變都見證住香港既發展。係觀塘落車之後，我通常都會經過裕民坊，望住新起既大樓，感覺同我細個時住觀塘既光景好唔同。有時，腦海會記起細個時，屋企人帶我係呢度附近玩，例如去下公園，唱下兒歌咁。月光光雖然曾經照地堂，但今日有通天高樓萬家燈火，可能再唔再需要月光。
Austin Yip 